laki

اسلام دعوة زواج تطوير الدات صحة جمال ديكور السر التنمية ايتيكيت
 
الرئيسيةس .و .جبحـثالتسجيلالأعضاءالمجموعاتدخول

شاطر | 
 

 أسهل طريقة للاقلاع عن التدخين

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
Admin
Admin
avatar

انثى عدد الرسائل : 2326
تاريخ التسجيل : 20/02/2008

مُساهمةموضوع: أسهل طريقة للاقلاع عن التدخين   الأربعاء فبراير 20, 2008 2:37 pm

الرجاء الإنتظار -- يتم تحميل الصفحة الآن:

يتضح من العنوان أن هذا المقال لمن يريد الإقلاع عن التدخين ، لكن اذا كنت غير مدخن فبالتأكيد أن من أقربائك أو أصدقائك أو من يعز عليك شخصا مدخنا فمررها له . أما انتم يا مدخنين ففتحوا عيونكم معي شوي . لا لا تفتحوا عيونكم ممكن تقرأ وأنت مغمض عادي ( لو تقدر ) !! أهم شي تفتح مخك . ولا تقعد طالع نازل تمتر الموضوع وتقول طويل وما عندي وقت ..! لا يا حبيبي ماهو طويل ولا حتندم على الوقت اللي تقضيه وانت تقراه ... عارف ليش ؟ لان هدف هذا المقال ان يخلصك من اكبر أعداء البشرية على الإطلاق وبدون منازع على مر التاريخ الا وهو 'النكوتين'



الحقيقة الموضوع المفروض يكون إلى كل المدخنين وليس إلى من يريد الإقلاع , تدرون ليش؟؟؟ لأنه لا يوجد مدخن على وجه الأرض إلا وهو يتمنى انه يقلع عن التدخين وأتحدى اللي يقول لي لا ما أبغى !!! حتى لو كابر وقالها فهو من جوته عارف ومتأكد انه يتمنى أن يقلع عن التدخين ويتمنى لو انه ما دخن من الأصل...



مافي احد قرر انه يصبح مدخن ... تذكر معي كذا هل جلست قبل ما تدخن مع نفسك وحسبتها صح وقررت انك تكون مدخن لما في التدخين من فوائد عظيمة ؟؟ طبعا لا مافي احد قرر انه يكون مدخن... ولا أغبى مخلوق على وجه الأرض ممكن يقرر انه يكون مدخن ويتعاطى السم الهاري اللي اسمه نكوتين ... كل المدخنين في العالم تورطوا في أول سيجارة ومن يومها وهم مدخنين . وأكيد كل مدخن في يوم من الأيام حاول انه يقلع عن التدخين ولاكن للأسف ماقدر!! لان ما عنده قوة إرادة ولا عنده صبر ولا عنده عزيمه ولا إصرار وتصميم !!



لحظه لحظه لا تروح إستنى عارف انك طفشت وتفكر انك ما تكمل المقال ، لان الكلام ذا سمعته مليوون الف مررة طول حياتك كمدخن ، ويمكن من كثر ما سمعته اقتنعت فيه وصدقت الخدعة اللي تقول ان الإقلاع عن التدخين يبغى له قوة عزيمه وإصرار وقوة إرادة . اكيد في صوت جوتك يقول ايش الخرابيط هذي اكيد الإقلاع عن التدخين يبغى له قوة إراده وعزيمة ؟؟!! طيب وش رايك لو اقول لك إن ما يبغى لك لا قوة إراده ولا عزيمة ولا معاناااااااااااااااااة عشان تقلع عن التدخين ؟؟!! ما انت مصدق صح !



اسمح لي أول شي قبل ما أقول لك على الطريقة أعرفك بنفسي ، أنا طال عمرك مدخن سابق ومقلع عن التدخين ولله الحمد والمنة حاليا . أنا كنت مدخن تقريبا لمدة ثمان سنوات ، وكنت زيك كذا وزي كل المدخنين أفكر انه الإقلاع عن التدخين يبغى له مجهود وقوة إرادة وعزيمة وأقول يا عمي بعدين خليها في رمضان ولا أقول لك بعد العيد ؟ تدري خلها في الصيف عشان وقت العمل في ضغط نفسي و ما اقدر استغني عن الدخان في الفترة ذي ... تدري خلها بعد الزواج ( عذر شائع عند العزوبية ) ... وهلم جرا من الأعذار ذي اللي أحاول بها تأخير هذا اليوم المشؤووم واليوم المفجع ويوم الفراق المؤلم اللي هو يوم ما استغني عن حبيبتي " السيجارة " .



وطبعا زي كل المدخنين كنت أحاول اقنع نفسي إني مستمتع بالتدخين واني القى فيه متعة غير عاديه .. يا شيخ أول سيجارة في اليوم هذي مقدسة .. وسيجارة بعد الأكل هذي شي خرافي وعالم اخر فيها من المتعة ما الله به عليم ... وما تحلى السهرات والسمرات الإ بالدخان ... ولو عصبت ولا احد نرفزني لازم أدخن عشان يروح الضغط النفسي ولا برتكب لي جريمة لو ما دخنت .... وكاسة الشاي مالها طعم إلا بسجارة ويعني عندك من الحاجات هذي كثير اللي يقنع فيها المدخن نفسه انه مستمتع بالتدخين وانه صحيح التدخين له مضار ولاكن برضه له فوائد زي هذي الخزعبلات؟؟ ..



تدرون ليش المدخن يحاول يدور عذر لتدخينه ويحاول يدور متعة في التدخين حتى لو متعة وهمية ؟؟ لانه صعب على المدخن يعرف انه بيدفع فلووس ويضر بصحته على الفاضي ؟؟ لازم يقنع نفسه انه فيه بعض الفوائد !!

تدرون اش الحقيقة المرره يا معشر المدخنين ... الحقيقه انك تدفع فلوس وتضر بصحتك بس وفقط عشان تشعر بما يشعر به الشخص غير المدخن ؟؟ صعبه صح !! عارف بس فكر فيها...



قبل ما تصيرمدخن هل كنت تحتاج للسجارة ؟!! هل كنت لازم تدخن عشان تتخلص من الضغط النفسي ؟؟ هل غير المدخنين الآن يحتاجون لسجارة عشان يبدؤون يومهم او عشان يستمتعوا بالوجبات او عشان يزيلوا الضغط النفسي او يستمتعوا بالسهرات والطلعات والمناسبات الاجتماعية ؟ طبعا لا ..

إذا ما يحصل عليه غير المدخنين مجانا .. يحصل عليه المدخنون بأضرار فادحة ... مع أنهم بإمكانهم أن يحصلوا عليه مجانا أيضا لو أنهم اقلعوا عن التدخين !!!..... طيب ليش ما يقلع المدخنين عن التدخين ما دام كذا ؟؟!! لان التدخين بكل بساطة هو ' إدمان النكوتين ' والمدخن يحاول يجيب أي حجة تبرر حصولة على السيجارة وما يبغى يعترف انه يدخن لأنه 'مدمن على النكوتين فقط' وانه مافي أي متعة او أي فائده من التدخين .



ما أبغى أطول عليكم يا زملائي في التدخين سابقا أنا كنت زيكم كذا مقتنع بكثير من الخزعبلات حول التدخين وكنت أقول مستحيل اقلع عن التدخين .. لأني حاولت أكثر من مرة إني اقلع بالإعتماد على قوة الإرادة والتصميم وللأسف ما قدرت وفشلت أكثر من مررة ... وهذا سبب لي إحباط لأني طلعت ضعيف الإرادة قدام نفسي وسلمت إني ما حقدر اقلع عن التدخين طول حياتي .. كنت أروح للدوام بدون دخان كمحاولة للإقلاع عن التدخين ولاكن تحصلني في وقت الغداء أسابق الريح للبقالة أجيب دخان ... يعني بالعربي كنت زي ما كل المدخنين كذا وعارف انها كلمة تزعل لاكن هي الحقيقة ... ' عبد للنكوتين ' .



وفي يوم من الأيام رحت مكتبة جرير أدور على كتاب معين ... وبالصدفة وقعت عيني على كتاب بعنوان ' الطريقة السهلة للإقلاع عن التدخين ' وعلى طول أول كلمة طلعت مني ' تضحك على مين ' ما كنت أتصور إن فيه طريقة سهلة فعلا تخليك تقلع عن التدخين وكنت أقول في نفسي أكيد بس عنوان الكتاب جذاب وكاتبه كاتب نصاب يبغى يمشي سوقه ويبيع وبس ...



وتلقاه مليان نصايح للمدخنين من نوعية النصايح اللي سمعناها الف مليوون مررة ... وما يدري اللي قاعد ينصحنا إننا كمدخنين نعرفها أكثر منه لأننا احني اللي نعاني منها .... وهو الأفندي سامع عنها بس وجاي يتفلسلف .... ويجي يقول لك 'إذا ما كنت ناوي تبطل ما حتقدر تبطل ' لا ياشيخ جبت الذيب من ذيلة على قولتهم ؟! معروفه انه ماراح يقلع عن التدخين إلا اللي ناوي يقلع .المهم قلت أكيد الكتاب ذا مليان نصايح طبية وتحذيرات من أضرار التدخين الصحية اللي احنى حافظينها صم ومكتوبة على كل بكت وما في احد مدخن إلا وحس بتأثير التدخين على صحته ..... ولا تحصله مليان نصائح دينية وأحكام التدخين ولا نصايح اقتصادية ومدى ما تصرف على الدخان .. ومن الحاجات ذي اللي كل المدخنين عارفينها.... ومشيت وتركت الكتاب .



سبحان الله كنت الف وارجع له من غير ما ادري ... كان في شي داخلي يقول جرب يا ولد اش خسران يمكن يطلع صدق ... وزي كل مدخن ' شاء أم أبى ' كنت أتمنى احصل على طريقة لو صعبه تخليني اقلع عن التدخين فما بالك بطريقة سهله !!!



المهم اشتريت الكتاب بعدما تصفحته بسرعة واكتشفت انه ما يتكلم عن أي نصائح طبية ولا إحصائيات كم واحد مات من التدخين وكم واحد صابه مرض سرطان وكم وكم والإحصائيات والصور اللي إحنى كمدخنين نحاول نتجاهلها وما نفكر فيها وأحيانا نزعل منها لأنها تسب حبيبتنا السيجارة . وأكثر شي شجعني إني اشتري الكتاب لمن عرفت انه مؤلف الكتاب مدخن سابق وخبرة ثلاثين سنة تدخين!!!!!!!!!!!



طبعا أنا مهما تكلمت ومهما قلت ما راح اقدر اعبر لكم عن إعجابي بالكتاب هذا وعن مدى الفائدة اللي استفدتها منه ... طبعا عارفين الفائدة ... طبعا إني أقلعت عن التدخين وتخلصت من عبودية النكوتين واشتريت بقيمة الكتاب هذا نفسي وحياتي وصحتي وحريتي وديني ووفرت فلوسي بعد.



لاكن اللي ما تعرفونه إني ويعلم الله ما عانيت ولا تعبت ولا كابدت أي مشقة تذكرعشان اقلع عن التدخين ... تدرون ليش .. لان فعلا طلع عنوان الكتاب مو خدعة .. فعلا كانت ' الطريقة السهلة للإقلاع عن التدخين ' ... أكثركم الحين يقول يا عمي بلى تخاريف اش هذا !! معقوله كتاب يخليني اقلع عن التدخين ؟؟!!!



انا قلت كذا قبلك .. وطبعا ما كان الشك في أهمية الكتاب والتأثير اللي ممكن تسويه الكتب ولاكن كان الشك في ان الكتاب ممكن يكون نصبه أو خدعه أو مجرد كلام فاضي عشان الأرباح المادية من بيع الكتاب ..... لاكن لو كان كلام فاضي ما كان أنا قدامك أقلعت عن التدخين بعدما قريته وأنا اللي لي سنوات أحاول اقلع عن التدخين وما قدرت قبل ما أقرى الكتاب ذا بعد مشيئة الله طبعا ، ولا كان 90% من اللي استخدموا الطريقة السهلة هذي قدروا يقلعوا عن التدخين .



وأحب أطمنك ان مؤلف الكتاب اللي هو زي ما قلنا مدخن سابق ماهو طبيب ولا دكتور .. هو في الحقيقه كان محاسب عادي في شركة وكان يتمنى يقلع عن التدخين ... وعلى مدار ثلاثين سنة حاول محاولات عدة كانت تنتهي بالفشل والإحباط ... إلى أن اكتشف الطريقة السهلة واللي ساعدته انه يقلع عن التدخين ... تدري بعدها انه بطل من المحاسبة وفصل من الشركة و تفرغ لمساعدة الناس على الإقلاع عن التدخين والكلام هذا قبل حوالي 25 سنة ... تدري انه عنده حاليا عشرات العيادات حول العالم فقط تعلم الطريقة السهلة ذي ويقصده مئات المدخنين يوميا ... ... أعتقد إن الموضوع يستحق الإهتمام ....



جرب واشتري الكتاب وما أنت خسران ترى سعره ما يتعدى 30 ريال .. وصدقني في أول يوم اشتريت الكتاب قريت منه مية صفحه ( نص الكتاب ) لانه فعلا كتاب يشدك وأسلوبه جدا مميز .... وفي اليوم الثاني كملت الباقي وأصبحت مقلع عن التدخين !!؟؟؟ ما أنت مصدق صح ؟؟!!!



أنا نفسي ماني مصدق .. معقوله أنا اللي ما كنت اقدر استغني عن السيجارة أكثر من ساعتين على بعض ..... بكل بساطة كذا اقلع عن التدخين بين يوم وليلة وبقراءة كتاب بس !!.... لا وبدون أي معاناه وبدون ما اعتمد على قوة الإرادة والعزيمة والإصرار!!... صدقني هذا اللي حصل ...



تدري ليش ما يحتاج قوة إرادة وعزيمة ... انا أقول لك إش يقول مؤلف الكتاب في الموضوع ذا ، يقول طال عمرك ' إذا كنت لا تريد أن تعبر الشارع فهل تحتاج قوة إرادة حتى لا تعبر ؟؟ طبعا لا .. نحن هنا نقضي على الرغبة في التدخين أصلا ولا نقلع عن التدخين مع رغبتنا فيه وشعورنا بالحرمان لذلك ، ولهذا لا نحتاج قوة الإرادة للإقلاع عن التدخين' . انا ما ابغى اتكلم عن الكتاب اكثر من كذا ولا احد يقول لي قول لنا بإختصار الكتاب اش يقول ؟ مافي شي اسمه بإختصار الرجال تعبان في تأليف الكتاب واخذ من وقته سنين عشان يكتبه ومافي كلمه مكتوبة إلا وهي تستحق القراءة ... فخلينا نبطل كسل شوية ونقراء الكتاب ...



أنا لو قلت لك يا عزيزي المدخن إش رايك أعطيك علاج وتجلس اسبوع كامل تعاني من الإنفلونزا الحادة والحمى ... ولاكن بعدها تقلع عن التدخين ... إش راح يكون جوابك ؟؟ عارف انك حتقول موافق ... انا اقول لك بس إقرى الكتاب ذا وصدقني مع اخر صفحة تقراها حتكون مقلع عن التدخين بمشيئة الله تعالى... وأنا بعدما تأكدت تماما إني أقلعت عن التدخين.... قررت إني أكتب الموضع ذا وانشره في أرجاء النت لأني أحب لزملائي سابقا في التدخين ما أحب لنفسي وإليكم تفاصيل الكتاب بالكامل :

تمت ترجمته في السعودية عن طريق الجمعية الخيرية لمكافحة التدخين الله يجزاهم عني كل خير



وهذا ما كتب في موقع الجمعية عن الكتاب :

http://www.antismok e.org/page. php?id=10101







' الكتاب الثاني الذي يحمل عنوان ( الطريقة السهلة للإقلاع عن التدخين للمؤلف ( ألان كار ) فقد جاء محتويا على 27 فصلا و 257 صفحة توقف فيها المؤلف عن تجربته الشخصية مع التدخين وكيف انه استطاع ان يقلع عنه ما بين عشية وضحاها بعد ان كان يتناول 100 سيجارة يوميا وهي الطريقة التي اعتبرها الأسهل للإقلاع عن التدخين وبناء على ذلك أطلق عليه مؤلفه هذا الاسم وأشار إلى انه لم يحس خلال فترة الإقلاع بالخسارة او زيادة الوزن أو الضجر أو الاكتئاب وقد حقق 90% ممن استخدموا هذة الطريقة نفس النتجية .يذكر أن هذا الكتاب حقق اكبر نسبة مبيعات على المستوى العالمي حيث بيعت اكثر من 6 مليون نسخة. '

الكتاب متوفر في مكتبة جرير وفي فروع الجمعية الخيرية لمكافحة التدخين

عنوان الكتاب ' الطريقة السهلة للإقلاع عن التدخين '

إسم المؤلف : ألان كار




وللناس اللي تحب الاختصار , المؤلف ما فاتته النقطة ذي واصدر كتاب ثاني مختصر وترجمته برضه الجمعية الخيرية وهذا ما كتب عنه في موقع الجمعية :

' ألإصدار الرابع للمؤلف ( الان كار ) ايضا جاء بعنوان ( كتيب الإقلاع عن التدخين ) يبلور 120 نقطة اساسية من كتاب الطريقة السهلة بصيغة مختصرة وسهلة التناول تساعد أي مدخن على الإقلاع بسهولة وبلا الم وبصورة طبيعية دون الحاجة الى قوة الإرادة او المعاناة من الأعراض الإنسحابية او الشعور بالحرمان او زيادة الوزن.


انا بصراحة قريت الكتاب الأول أو الأساسي أما الكتاب الثاني المختصر فما عندي فكرة عنه لاكن بما انه نفس المؤلف ونفس الفكرة اكيد انه ممتاز ايضا . ولك عزيزي المدخن ولا اقول لك عزيزي المقلع عن التدخين إن شاء الله حرية الإختيار . وأعرف جيدا إنه بينك وبين الإقلاع السهل البسيط الميسر إنك تقرأ احد هذي الكتب .

ولا تنسونا من دعاكم وأتمنى من أي واحد يقلع عن التدخين عن طريق الكتب هذي يراسلني ويقول لي .

والسلام ختام
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://laki.discutforum.com
 
أسهل طريقة للاقلاع عن التدخين
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
laki :: حياتك :: صحتك-
انتقل الى: